الأحد، 29 أغسطس، 2010

مصر مش امي ولا حتي مراة ابويا

سيداتي آنساتي ساداتي أكتب هذه السطور وانا في قمة قواي النفسيه والعصبية - يعني مش مجنون ولا حاجه -


زمان الست نانسي عجرم سألت سؤال وجيه وقالت لو سألتك انت مصري تقولي ايه؟؟ ركزوا معايا لان المشكلة انها برضه جاوبت علي نفسها لانها ملقيتش حد يعبرها منا فعلا لو مصري هقول ايه؟؟ اقولكوا !

انا مصري ابن مصري وابن مصر بياخد بالجزمة وملوش حقوق في هذا الزمان

انا هحكيلكوا حدوتة قبل النوم النهاردة ويا رب تعرفوا تناموا

كالعادة ولاني مهندس مدني مطحون في الشغل اخدت قرار ووقفة وقفة رجاله مع نفسي - أصل انا بشرب بيريل اليومين دول - وقررت اقضي اجازتي في شقتي المتواضعه في فيصل املا اني اعرف انام كويس واخد قسط من الراحه وقد حصل صحيت يوم السبت كالعادة بس الفرق اني فايق ومنتعش ومزاجي رايق.

هي ساعة زمن لقيت قنبلة انفجرت في وشي ومش اس قنبلة دي اهم قنبلة في القرن الواحد والعشرين الكهربا قطعت حوالي الساعه 1 ظهرا - اه والله في مصر الكهربا بتقطع مع اننا المفروض عندنا فائض وبنصدره - ولان سعادة معالي الوزير الباشا وزير الكهربا قال اننا لازم نرشد وطالما مش هترشدوا فاحنا مضطرين نربيكوا من دور وجديد وتوصل الجهابذة في قطاع الكهربا الي الحل - قطع الكهربا - حاجه بسيطة وطبعا لاننا لازم نقول حاضر ونعم قولت اهي ساعه زي ما هو وعد وقال - انا لن اسمح بقطع الكهربا لاكتر من ساعه واحده يوميا - لا يا شيخ كتر خيرك تكونش الكهربا دي بتاعتك وانا مش عارف؟! 


المهم والاهم طلعت اليو اس بي - لان اتصالات دلوقتي وقتها - وكالعادة دخلت اشكي همي لصحابي شوية وساعه عدت قلت خير الكهربا هتيجي - لا مش بالسرعه دي - قولت يمكن خلوها ساعتين - برضه لأ - الاهم من كده اللاب زهق وقفل علي صباعي وطبعا منسيش يتف في وشي وقالي - خلي عندك دم البطارية خلصت - وبالتالي لجأت للتحايل والحلول البديلة ودخلت من الموبايل وعدت ساعه وكمان ساعه وإذ فجأة بدأت تندع الساعه 3.5 الكهربا جت احمدك يا رب - هم 10 دقايق وقطعت - والله قطعت


فضلت فاتح من الموبايل لغاية لما زهق مني وبرضه منسيش وهو بيقفل انه يتف في وشي كالعاده - بقي دي اخرتها يا بشر - ركزوا معايا بقي علشان الجاي اصعب المفروض اني اعمل اكل طب ازاي ؟ اسمع واحد لطيف يقولي علي النار عادي اقوله واجيب ميه منين مهو الموتور مش شغال نسيت اقولكوا - الميه عندنا مبتطلعش من غير الموتور - وهنا افتكرت الحاجه الله يباركلها شيرين وهي بتقول مشربتش من نيلها؟ انا اقولك لا والله ما لاقي الميه يا اختشي علشان اشرب المهم قولت انام شوية


دخلت انام طب انام ازاي وانا غارق في بحيرة من العرق وهنا افتكرت سعادة البيه الوزير بتاع الكهربا يا تري هو دلوقت حاسس بيا طب يا تري هل هو مشغل التكييف ولا طافيه علشان يوفر الكهربا والاهم من كده هل الكهربا بتقطع عنده زينا ولا لأ؟؟ لقيت الشيطان الي هو المفروض متسلسل في رمضان بيقولي - يا عبيط ده الوزير اكيد الحمام فيه تكييف - وهنا علي الساعه 4.5 قررت اتصل بالوزير حد لطيف يقولي هتكلمه بجد؟ - والله كلمته بس كان غير متاح- منا واحد من الشعب برضه الي هو بيخدمهم ولا ايه؟؟

وبعد محاولات مستميتة للنوم اخيرا نمت وصحيت بعد المغرب والاقي الكهربا برضه قاطعه - والله ما بهرج - والمية طبعا قاطعه ومش عارف اعمل اكل ولا اي حاجه وجميع وسائل الاتصالات مقفولة الموبايل فاصل واللاب كذلك - يا كفرة احنا في مصر مش الصومال - المهم فضلت لغاية الساعه 10 علي ما عربية طواريء جت الشارع - قال طواريء قال - علشان تشوف المشكلة نزلت اكلم البيه حسسني انه مهندس وهو الي هيحلها قلتله انت بتعمل فينا كده ليه دانا جنب المحطة اومال الناس الي في اخر الشارع تعمل ايه؟ قالي دي اوامر يا باشا وهنا كانت الشرارة صرخت فيه ولما دي اوامر مبتقطعوش الكهربا علي البهوات الي عندهم تكييفات في كل حته في البيت حتي في الحمام ولا بتتشطروا علينا احنا بس المهم شد وجذب وشوية زعيق مني والناس هدوا الموضوع واخدت نفسي ورحت اقعد علي القهوة وفطرت بعد المغرب ب 5 ساعات حوالي الساعه 11 ضربت شوب الموز باللبن المعتاد وشحنت الموبايل وقلت ارجع الشقة كانت الساعه 12.5 صباحا يعني 12 ساعه متواصلة وتخيلوا لقيت الكهربا جت وتوتة توتة فرغت الحدوتة وتصبحوا علي خير

هناك تعليقان (2):

  1. أنا هتطاعف معاك علشان هنبقي زمايل في الهندسة المدنية في المستقبل القريب
    قطع الكهربا والميله دي خطة من الحكومة علشان تقود سيادتك للجنة عايز تعرف ازاي اقرا البوست ده وانت تعرف ازاي هتدخل الجنة علي يد هذه الحكومة الكريمة

    http://klammganyn.blogspot.com/2010/08/blog-post_25.html

    ردحذف
  2. مش عارفة اقولك ايه ؟؟ ماهو مالناش بلد غيرها
    طيب شوف حالنا دلوقتي ايه
    طيب انا ام وعندي ولاد وقلبي واكلني عليهم لو ده حالنا دلوقتي حالهم هما هيبقى اييييييه ؟؟
    ده فيلم رعب بشوفه لايف قدامي كل يوم قبل ما انام

    ردحذف

إن كان من حقك ان تعلق فليس من حقك ان تسب غيرك